لسة بشتكي لمديري من يومين وبقول له اني بفكر ألبس نقاب لما أنزل الشارع و اقلعه لما أوصل مطرح ما أنا رايحة! سألني ليه؟ قلت له عشان أبسط حاجة اني أما بركن عربيتي و أمشي لحد المكتب مسافة عشر خطوات بتعاكس ٧ مرات!! و مش عشان أنا مزة و فظيعة في حلاوتي! مش ده قصدي... انما عشان في رجالة كتير متستحقش أساساً لقب رجالة بيبقوا زي الكلاب المسعورة بتعوي على أي حاجة تشوفها!
اللي بيرمي كلام على البنات وهما ماشيين عمره فكر إنه في بنات بتكون خايفة كل ما عربية تهدي جمبها أو مجموعة ولاد تيجي في وشها في الشارع من كتر ما هو شيء عادي و جزء من فكرة المشي في مكان عام!!
أنا عن نفسي أعصابي بتبوظ لو موتوسيكل جه من ورايا و بحاول قد ما أقدر ممشيش من قدام أي تجمع لشباب في الشارع عشان محتكش بيهم و محدش يضايقني! وبكره اليوم اللي مبلاقيش فيه ركن غير جمب الكشك اللي ملموم عنده ولاد الشارع كلهم عشان ببقى عارفة اني هتفصفص من فوقي لتحتي و هسمع كلام ينكد عليا!
الناس اللي بتدي نفسها الحق انها تتعدى على حرمة البنات و تلمسهم؟ هما فاهمين إن الحاجات دي ممكن تأثر على نفسية البنت عمرها كله؟ جسم البنت ملكها هي بس و عن نفسي شايفة إنه اللي يدي نفسه حق تعدي على هذه الملكية المفروض أيده تتقطع!
و ده برضه و أنا مفتحتش في موضوع العساكر و الظباط اللي شغلتهم الوحيدة في الشارع هي المعاكسة و قلة الادب! بدل ما ياخده بالهم من البنات هما أول المتحرشين و أشرسهم! أنا مش هحكي عن المآسي اللي شفتها أيام كاس الأمم أما مصر كنت مستضيفاها و نبقى خارجين من وسط عساكر الامن المركزي! حفلة بقى و اللي أيده تطول حاجة يمسكها! هيصة بقى ومولد كل سنة و أنت طيب!
أما بقى عشان أفتح على أطفال الشوارع و اللي بيحصل فيهم مش هاسكت و هنقعد نكتب من هنا لبكرا! أطفال في عمر الزهور بيتم اغتصابهم عادي و أكتر من مرة والحكومة عارفة كويس قوي و مبيعملوش أي حاجة عشان يحموا حقوق الاطفال دول! مع إن الاطفال دول هما أول ناس بتكون نفسياً مهيأة انها تعتدي و تتحرش نظراً للبيحصل فيهم! بيكونوا فاكرين إن ده عادي!
ليه في مصر عايزين الحكومة تحترمنا ليه إذا احنا مش بنحترم بعض؟ البنات في الشارع من حقهم على من يقال عنهم رجالة انهم يحموهم و يحترموهم مش يكونوا أول ناس تسيء لهم بالكلام و النظرات و في حالات التطرف مد الأيد!
أنا قعدت في أمريكا ٩ شهور كان أكتر شيء بعمله و أكني محرومة هو المشي في الشارع! مجرد احساسي اني ماشية بكل أمان و إن مفيش ٥٠ عين مبحلقة فيا و ٥٠ كلمة زي القرف هتسمم بدني بيخليني استمتع بنفسي و أنا بعمل حاجة المفروض انها عادية جداً
و بلاش كلام فارغ بقى من نوعية البنت هي اللي بتستفز الولد إنه يعكاسها لئن زمان أيام جدتي و جدتك كانوا بينزلوا بالفساتين والجيبات القصيرة و محدش كان بيقولهم تلت التلاتة كام!! و مهما البنت لابسة فهي حرة و إنت كرجل غصب عنك تعملها إحترام! و قدامي بشوف بنات محجبة و منقبات لابسين عبايات و بيتعكسوا برضه! اللي بيقولوا إن البنات بتحب تتعاكس فهل ده معناه إن أمك و أختك و صحبتك بيحبوا يتعاكسوا؟؟ طالما إنت مش بنت و محستش بالكسفة و الإنكسار بتاع واحدة تم التحرش بيها فا مش من حقك تقرر انها عاجبها كدة!
عملنا ثورة ضد الطغيان و الإستبداد و حققنا شئ كان شبه مستحيل و شلنا الدكتاتور... يا ترى هنقعد ٣٠ سنة تانيين على ما نشيل بقى الدكتاتور اللي جوا كل واحد فينا؟ اللي بيدي نفسه الحق إنه يغتصب و يعاكس و يبص ويلقح كلام عشان هو "راجل" و جامد و عارف إنه غالباً البنت مش هترد هنفضل ساكتين عليه؟ لازم نتغير من جوانا قبل من نتوقع أو نطلب تغيير ظروفنا!
بحلم بمصر فيها أمان وحرية و إحترام.. نفسي الراجل في الشارع يبقى راجل فعلاً و بدل ما يبصلي على اني رجلين وصدر يبصلي على اني أخت دوره يخلي باله منها!
صعبة قوي دي يعني؟
YA RAB NEFHAM!!!!!!!!! Well Said lazlazation ;)
ReplyDeleteI think legislation, and putting law into action is a very imp. step. Right Now!!
ReplyDeleteSoooo True!
ReplyDeleteالبص مش جريمة,لوحد بص عليكي مش معنى كده انه اهانيك او طعنيك في شرفيق, امر طبيعي ان لما الواحد يكون معجب بي بنت يبص عليها ,زي ما في ولاد بيبصو على البنات في بنات كتيرةبتبص على اولاد ,ده امر طبيعي ,الاعجاب مش جريمة انا سعات لما بمشي في الشارع الينات بتبص عليا
ReplyDeleteهم يبصوا زي مهما عايزين مقدرش اقلهم ميبصوش :) بنسبة موضوع المعكسات انا شايف ان كلاميك مبالغ فيه شويه .يمكن انتي بتحبي تلعبي دورالضحيية
صحيح ان في معكسات كتيرة بس مهياش بالشكل ال انتي بتوصفيه لازم باردو تكوني عرفه ان "السكس" موضوع محرم هنا في مصر على عكس امريكا معظم الناس ديه الي بتعاكس عمرهم ماقامولا علاقة مع بنت فلما بيشوفوا واحده حلوه او واحده لبسه قصير شوية بيتجننوا و مبيقدروش يتحكموا في نفسهم
انتي ممكن قوي انك تتجهليهم و تتعتبريهم مش موجدين بدل متسمحلهم ان هما يديئوكي
@SOn of whatever :p
ReplyDeleteيعني ايه تسمحلهم انهم يضايقوها ؟؟
و البنات اللي بتبص عليك يا جامد انت بيبصوا علي جسمك و بيبقوا عايزين ينهشوه ولا بيبصوا اخرهم علي شعرك عشن فردو مثلا ؟؟
اكيد بيبصوا على الينسز اللى هوا لابسة :D
ReplyDeleteلو اللبس مش ملفت
ReplyDeleteاكيد مافيش معاكسه
يا جدعان وحياة ميين الولاد اللى محسسانا انها مش عايشة فى مصر دى و بتقول من حقهم و من حقك ,, تركز شوية فى الكلام علشان الكلام ده بيحصل قدامى كل يوم و سامحونى لما احكى الموقف دا ,, كنت ماشى مع بنات صحباتى فى الكلية بوصلهم للمواصلات ,, قام واحد عاكس فقولت عادى يعنى و بصيتله بقرف كدا وخلاص ,, قام واحد جه جانبه تانى و عاملى فيها بتاع ربنا قوى على الاخر و قعد يبص لجسمهم و يقول ما هو حل من حلين يا اما يهتدوا و يبطلوا التبرج
ReplyDeleteيا اما ما ينزلوش من بيتهم
فا هو ده كدا يبقى راجل محترم يعنى لما يبص لواحده و يعاكسها ولا يقول عليها كلمة كدا او كدا ولا الشباب اللى بيبقوا واقفين و واحدة فى حد بيتحرش بيها دول رجالة