مش ناسيين

مش ناسيين شهداء كنيسة القديسين، شهداء ال ١٨ يوم، علي ماهر، عاطف يحيى، رامي فخري، ضرب الشوم أول يوم رمضان، شهداء سفارة الصهاينة، عصام عطا، شهداء ماسبيرو، شهداء محمد محمود، شهداء مجلس الوزراء، ست البنات، شهداء بورسعيد و شهداء شارع منصور..

مش ناسيين

مش ناسيين

مش ناسيين

Photo Credit: Mostafa Sheshtawy @msheshtawy

                           

العلبة دي فيها إيه؟

إحساس رهيب بالذنب... كم الشهداء و المصابين و المساجين بقى فوق الوصف... مكانش ده اللي تخيلته يوم ١١ فبراير ٢٠١١... كنت متخيلة إن بعد سنة هنكون في مكان تاني خالص.. 

بحس بالذنب إن في ناس ماتت و أنا عايشة! بحس بالذنب إن في ناس مصابة و أنا كويسة! بحس بالذنب إن في ناس مسجونة و أنا "حرة" لو يجوز أصلاً اننا نقول على السجن الكبير ده حرية

وجع رهيب مش راضي يفارقني...

صرخات أب يوم فض إعتصام مجلس الوزراء و هو بيقول "أاااااااااه خودوني عند ابني.. ابني جوا.. أنا عايز أروح لإبني"

إنهيار ماري دانيل عند ماسبيرو بعد ما شافت مينا و اصحابها و هما بيهدوها و بيبكوا في صمت ناتج عن هلع

حرقة قلب أخو عصام عطا و هو بيقول عصام الناس نسياه عشان عاش فقير و مات فقير

دموع الراجل العجوز عند ماسبيرو و هو بيكلم نفسه "ابني فين؟ ابني راح.. داسوا على ابني بالدبابة... ابني راح مني"

ذهول أم محمد مصطفى و هي خارجة من الجامع بعد تشييع الجنازة.. مش مستوعبة المصيبة اللي هي فيها.. ذهول تام

كسرة نفس أبو رضا عبد العزيز أما كلمته أسأله عملوا إيه عند الدكتور و هو بيقولي "رضا خلاص مش هيشوف تاني يا آنسة"

آهات وجع أية بعد ما خرجت من مركز التعذيب في مجلس الشعب و احنا بنساعدها تمشي

و حاجات تانية مش عارفة حتى اكتبها.. كان نفسي ما نخذلهمش و مش عارفة الظروف كانت أقوى مننا و الموضوع هو اللي صعب ولا احنا اللي تخاذلنا بإن بعضنا ماكنش بيتصرف صح أو إن بعضنا زهق في نص المشوار أو بعضنا اللي إستهتر 

و اهه السنة فاتت و زاد على الشهيد ١٠٠ شهيد تاني و على المصاب ٢٠٠ مصاب تاني و على المسجون ١٠٠٠ مسجون تاني... هنعمل إيه؟

ليلة أهنت فيها الذات المقدسة: مختار الملا

محتاجة أفش غلي.. 

من سوء حظي، بنت أخو مختار الملا من ضمن "اصدقائي" على الفايسبوك.. كنت كاتبة تعليق على صفحتي الخاصة، مش تعليق، إقتباس لمقولة قالتها دكتورة هبة رؤوف على صفحتها في تويتر بعد التصريحات العجيبة بتاعت الملا عن إن البرلمان لا يمثل الشعب و حاجات كدة متطلعش غير من أحد أباطرة المجلس...

 المقولة كانت

"الشحات أحرج السلفيين والملا أحرج المجلس وصبحي صالح وأبو بركة أحرجا الاخوان وساويرس أحرج نفسه - واجب المرحلة : قل خيراً.. أو فاصمت"

أما سألتني و الملا أحرج المجلس ازاي؟ قلتلها بتصريحاته الأي كلام عن إن مجلس الشعب لا يعبر عن أغلبية الشعب! ازاي و ازاي بقى أقول إن عمها رضي الله عنه بيقول أي كلام؟! و هاتك يا ردح.. كلمة مني و كلمة منها مسكنا في بعض و في الآخر قلتلها إن واضح إن قرايب الناس "المهمة" مايعرفوش إن نظام الطبطبة بتاعت زمان راح و من ساعتها ماردتش عليا و أنا مسألتش و هكسر قلة وراها..

النقطة هنا إيه... أنا انبهرت إن لسة التفكير ده موجود!! إن أنا بنت فلان أو بنت أخو فلان و مش مسموح لحد يعترض على كلامي أو يجيب في سيرة قريبي "المهم" عشان احنا فوق الإنتقاد! يعني أنا اتفهم موقفها لو أنا كتبت مثلاً مختار الملا إبن كلب.. ساعتها ماشي أنا حبقي بوجه إهانة واضحة و صريحة لعمها و من حقها تعترض.. انما أنا بانتقاد تصريح رسمي.. فين الازمة؟ أنا مش فاهمة احنا بنرجع ورا ولا بنتقدم؟ 

كنت متخيلة أوي إن نوعية البشر دي يا إما انتهت بعد الثورة يا إما هيختشوا على دمهم و يفهموا إن مافيش حد فوق المحاسبة بس هما أصلاً هيفهموا ده ازاي إذا كل المجرمين في حق مصر لم يحاسبوا حتى الآن و تحت رعاية المجلس العسكري اللي الملا إسم النبي حارسه و صاينه جزء منه؟؟

اه يانا على الثورة اللي مافيش وراها غير وجع القلب و قلة القيمة مع كل من هب و دب! بس قدرنا كدة.. الثورة مستمرة ضد كل فاسد و فاشي و دكتاتور و مبارك و طنطاوي و ملا

"وحياتك لأفضل أغير فيكي لحد ما ترضي عليه"

رسالة إلى الوالي

إلى المجلس العسكري،

بكتب لكم رسالة يمكن عمرها ما هتوصل أو يمكن هتوصل و هتسببلي مشكلة بس أنا كنت حاسة إني محتاجة أقولكم الكلام ده

أول يوم سمعت هتاف الجيش و الشعب أيد واحدة و شفت الناس اللي بتطلع تتصور مع الدبابات و العساكر بكيت من الفرحة و كنت من الآف المصريين اللي صدقوا إن الجيش هيحمي ثورة

الجملة دي مش كلها اكذوبة لئن الجيش فعلاً كان ممكن يحمي الثورة عشان مين هو الجيش؟ أخويا و جاري و ابني و البقال و المهندس... فعلاً فيهم ناس قلبهم على مصر و في منهم ملايين نفسهم في الحرية و الديمقراطية و العدالة الإجتماعية... انما اللي لا يمكن كان يحمي الثورة و ماعرفش إحنا كان مخنا فين لما صدقنا الكذبة دي هما جنرالات مبارك اللي هما انتوا

استنوا بس ماترموش الجواب... 

ازاي هتحاسبوا مبارك و أعوانه إذا انتم شركاؤه و أوفى اصدقاؤه؟ كنتوا فين يوم موقعة الجمل؟ كنتوا فين يوم جمعة الغضب؟ مين اللي أصدر أوامر بتحويل المتحف المصري لبيت رعب مباح فيه تعذيب الثوار على أيد الشرطة العسكرية؟ مين إللي حبس مايكل نبيل و عمرو البحيري و محمد إسحاق و ١٢،٠٠٠ ألف مدني في السجون الحربية بعد الثورة اللي حلفتوا تحموها؟ مين اللي قتل علي ماهر؟ مين اللي حرض على المتظاهرين في مسيرة العباسية  اللي كنت نهايتها موت محمد محسن؟ مين اللي فض الاعتصام في صيام رمضان و ضرب أهالي الشهداء اللي كانوا بيناموا على الرصيف عشان يطالبوا بحق عيالهم اللي ماتوا في الثورة اللي حلفتوا هتحموها؟ مين اللي هدر دم جنودنا على الحدود سنين و إستحسن يضرب ولاد بلده بغاز و نار على إنه ياخد موقف يرد كرامتهم؟ مين إللي قال للشباب إنزل على ركبك يوم ما طلبوا بس إن علم الصهاينة ينزل؟ و مين اللي بيحاكم طفل عمره ١٤ سنة عشان هتف في ماتش كورة ضد وزير داخلية فاشي سابق قامت الثورة ضده هو قبل ما تقوم ضد مبارك نفسه؟ مين الهتك عرض البنات بكشوفات العذرية و مين اللي دهس المتظاهرين الأقباط تحت المدرعات و مين ضرب مينا دانيل بالرصاص عند ماسبيرو؟ مين اللي ساب لمبارك و كل المتهمين معاه شهور يستف ورقه قبل ما يفكر يحاسبهم؟ مين اللي ساب مبارك في اجازة مفتوحة في قصر في شرم الشيخ بعد ما قتل ٨٠٠ مصري؟ مين اللي بيحرم علاء عبد الفتاح من إنه يحضر ولادة ابنه البكري و سكت عن مذبحة محمد محمود لحد ما راحت أرواح ٤٤ بطل و عيون الآف؟ مين اللي فاكر إنه عشان يحمي نفسه هيدوس علينا بالجزم و هنسكت و فاكر إن قبضة الحديد لسة بتخوفنا و بيمد في قانون الطوارئ؟

أنا اسفة إني ببلغكم بالأخبار السيئة بس إجابة كل الأسئلة دي هي : انتوا

انتوا أكبر خطر على الثورة و كان أكبر خطأ ارتكبناه هو ترك الميدان يوم التنحي و عدم الاصرار على تسليم السلطة لجهة مدنية من البداية.. لكن كل خطأ ممكن يتم تداركه في أي وقت مافيش مشكلة!

لازم تفهموا إن أهم مطلب لينا بعد ما نخلص منكم و هنخلص منكم عاجلاً أو أجلاً هيكون محاكمتكم على كل الجرائم دي...

أنا اسفة إني في يوم صدقت وعودكم... بس اللي مصبرني إن التاريخ هايشهد على الحقيقة و هتفضلوا ليوم الدين في ذاكرته مجموعة من اللصوص... سرقتوا حلم و حولتوه لكابوس و في الآخر هنصحى و هنفوق و هنرجع كل حاجة زي ما كانت و هتعيش مصر حرة مستقلة و هيسقط حكم العسكر شئتم أم أبيتم 

تحياتي،

فرح سعفان

مجلس البلالين

سرعة تحرك الاحداث من ساعة ما الثورة بدأت غير طبيعية! في حاجات كتير اتغيرت احنا ماكناش نتخيل انها ممكن تحصل... ممكن تختلفوا معايا بس أنا بنسبالي الحاجات الصغيرة بتفرق أكتر من الكبيرة... 

سألتوني يعني إيه؟ يعني مثلاً مكناش نحلم يوم نشوف جرافيتي خالد سعيد مرسوم على وزارة الداخلية في ظل وجود الآف المتظاهرين... اه ما أنا فاهمة اننا عملنا ثورة لاكن وقت ما خالد مات كنا بالعافية بنعمل وقفة صامتة على الكورنيش!

مثلاً عساكر مصر على الحدود ياما ماتوا عن طريق "الخطأ" برصاص الصهاينة لاكن عمرنا ما كنا بنسمع عن المواضيع دي عشان طبعاً النظام السابق كلب إسرائيل و رضاهم كان أهم مليون مرة من دم المصريين انما بعد الثورة حصل إختلاف و هو اننا سمعنا عن الحادث و رحنا لحد باب العمارة اللي فيها السفارة الصهيونية و إتظاهرنا...

يجب التنويه إن محصلش إختلاف في إن رضا إسرائيل أهم من دم المصريين!

دي حاجة بسيطة و يمكن في نظر ناس كتير تبقى حتى ملهاش معنى نظراً لإن يوم ١٥-٥-٢٠١١ كان في تظاهر أمام السفارة و الجيش إعتدى على الشباب بالضرب و تم القبض على بعضهم و مش بس كدة.. لما قالوا عايزين ننزل العلم كان الرد "لأ ده بنطلوناتكم هي اللي هتنزل" في إسلوب قمة  في السفالة ولا أكن الشباب دول هما العدو!

 نفس الثوار اللي معظم الشعب مخنوق منهم هما هما نفس الناس اللي شفتهم قدام السفارة امبارح... يعني لا هما اجانب بأجندات ولا هما عيال خاينة! لأ مصريين محروقين على دم العساكر المصريين الابطال و كانوا أول ناس أشوفهم يقولوا لو لازم الامر هتطوع في الجيش بغض النظر عن المبالغة الرهيبة في رد الفعل! 

طب دلوقتي بعد ٤٨ ساعة من الاعتداء اللي بيه إسرائيل خرقت معاهدة السلام لم يعتني المجلس العسكري بتوجيه كلمة لتوضيح الأمور للشعب أو بإتخاذ موقف يليق بمكانة مصر التاريخية زي ما بيقولوا! يعني الثوار يهتفوا يسقط يسقط حكم العسكر ينطصوا محاكمات عسكرية و إسرائيل تقتل العسكر مانطقوش حرف؟ بالذمة مش حرام عليكم؟

و نيجي بقى لقنبلة الموسم و كل موسم... بيان مجلس الوزارء... فرحنا و هللنا.. كان ناقص شوية و أشغل يا حبيبتي يا مصر و أقوم أرقص لما نزل يقول سحب السفير و مطالبة بإعتذار رسمي و مصر هترد على أي نشاط عسكري و قلت بسم لله ماشاء الله مجلس الوزارة بلغ و بقى راجل! ننام نصحى نلاقي البيان إتشال و طلع بالونة كبيرة فرقعت في وشنا زي الدوغوفات!

فين بقى الناس اللي كنت بتأييد المجلس العسكري ضد الثوار المجانين اللي بيضيعوا البلد بعندهم و اصرارهم على تحقيق مطالب الثورة اللي الشعب كله كان بيأيدها؟ فين ردهم على تخاذل المجلس و عصام شرف في الحفاظ على كرامة المصريين؟ حد يرد عليا والنبي

على فكرة.... موضوع الإعتداء الإسرائيلي فعلاً لو إستخدم صح ممكن يبقى تذكرة رجوع الثورة.. 

Photo Credit: Mostafa Sheshtawy - @msheshtawy