وجع قلب

أنا مؤمنة إن كل شيء قضاء و قدر و إن ربنا بيسبب الأسباب و له في ذلك حكم.. بس اللي مش بقدر اتحكم فيه هو وجع القلب اللي بقى ملازمني أغلب الوقت بسبب كل حاجة وحشة حصلت السنة اللي فاتت..

في ناس كتير بتصعب عليا و بحس إني مقصرة في حقهم و إني قليلة أوي بس مش عارفة أعمل إيه!! 

رضا عبد العزيز شاب صغير عنده ١٩ سنة... فقد عينيه الاتنين! ليه؟ جابوا منين القسوة دي؟ 

عصام عطا... عذبوه لحد ما مات و لحد النهاردة مش هاين عليهم يبردوا نار قلب أمه بتقرير طب شرعي.. 

رامي فخري... مات مضروب بالرصاص بعدين نزلولنا بيان إنه خطأ غير مقصود ولا لو كان ورقة طارت في الهوا

مرام اللي فرقع في بطنها خرطوش خلاها تتعالج ١١ شهر كاملين و تفقد أجزاء من أعضائها

مايكل مسعد اللي داست عليه الدبابة قدام عنين خطيبته

ست البنات اللي هتكوا سترها

معوض طالب صيدلة اللي في غيبوبة فوق الشهرين

محمد مصطفى اللي عملنا المستحيل عشان نحاول ننقذه لكن فشلنا لئن رصاص العسكر كان أقوى مننا 

كام واحد أنا معرفش أساميهم من مصابين و شهداء... مش متخيلة معاناة أهاليهم و احساسهم.. بالذات بعد مرور سنة أو شهور بدون محاسبة أي حد أو حتى إعتراف بإن في تجاوزات حصلت... ليه أصلاً الموضوع يتحول من اهتمامنا بمشاكل الناس اللي فقدوا حد بيحبوه أو أصيبوا لاهتمامنا بمشاكلنا النفسية لعدم قدرتنا على مساعدتهم بالشكل اللي هما فعلاً محتاجينه...

كان زمانا دلوقتي بنكرم الأبطال مش بنبكي على زيادة عددهم و ضياع حقوقهم... 

حسبي الله و نعمة الوكيل

الكذاب بيخش النار

مافيش أي سبب مقنع للتدوينة دي غير إني عندي حالة إنبهار رهيب بقدرة سيادة اللواء منصور العيساوي على التأليف و الكذب.

بعد معركة محمد محمود اللي استمرت ٥ أيام راح فيها ٤٤ ضحية و أصيب فوق ال ٤٣٠٠ مواطن برصاص حي و خرطوش و حالات إختناق من الغاز المسيل للدموع.. معركة أنا كنت حاضرة كل يوم فيها  و شفت بعينية المصابين و رجعت من الغاز... يجي سيادة اللواء يقولك إن كل دة محصلش و إن هما إضرب عليهم غاز و رصاص و مولوتوف! 

الفيديو أنا حسيبه على المدونة للذكري و الزمن عشان كل ما أحب أضحك أرجعله.