لسة بشتكي لمديري من يومين وبقول له اني بفكر ألبس نقاب لما أنزل الشارع و اقلعه لما أوصل مطرح ما أنا رايحة! سألني ليه؟ قلت له عشان أبسط حاجة اني أما بركن عربيتي و أمشي لحد المكتب مسافة عشر خطوات بتعاكس ٧ مرات!! و مش عشان أنا مزة و فظيعة في حلاوتي! مش ده قصدي... انما عشان في رجالة كتير متستحقش أساساً لقب رجالة بيبقوا زي الكلاب المسعورة بتعوي على أي حاجة تشوفها!
اللي بيرمي كلام على البنات وهما ماشيين عمره فكر إنه في بنات بتكون خايفة كل ما عربية تهدي جمبها أو مجموعة ولاد تيجي في وشها في الشارع من كتر ما هو شيء عادي و جزء من فكرة المشي في مكان عام!!
أنا عن نفسي أعصابي بتبوظ لو موتوسيكل جه من ورايا و بحاول قد ما أقدر ممشيش من قدام أي تجمع لشباب في الشارع عشان محتكش بيهم و محدش يضايقني! وبكره اليوم اللي مبلاقيش فيه ركن غير جمب الكشك اللي ملموم عنده ولاد الشارع كلهم عشان ببقى عارفة اني هتفصفص من فوقي لتحتي و هسمع كلام ينكد عليا!
الناس اللي بتدي نفسها الحق انها تتعدى على حرمة البنات و تلمسهم؟ هما فاهمين إن الحاجات دي ممكن تأثر على نفسية البنت عمرها كله؟ جسم البنت ملكها هي بس و عن نفسي شايفة إنه اللي يدي نفسه حق تعدي على هذه الملكية المفروض أيده تتقطع!
و ده برضه و أنا مفتحتش في موضوع العساكر و الظباط اللي شغلتهم الوحيدة في الشارع هي المعاكسة و قلة الادب! بدل ما ياخده بالهم من البنات هما أول المتحرشين و أشرسهم! أنا مش هحكي عن المآسي اللي شفتها أيام كاس الأمم أما مصر كنت مستضيفاها و نبقى خارجين من وسط عساكر الامن المركزي! حفلة بقى و اللي أيده تطول حاجة يمسكها! هيصة بقى ومولد كل سنة و أنت طيب!
أما بقى عشان أفتح على أطفال الشوارع و اللي بيحصل فيهم مش هاسكت و هنقعد نكتب من هنا لبكرا! أطفال في عمر الزهور بيتم اغتصابهم عادي و أكتر من مرة والحكومة عارفة كويس قوي و مبيعملوش أي حاجة عشان يحموا حقوق الاطفال دول! مع إن الاطفال دول هما أول ناس بتكون نفسياً مهيأة انها تعتدي و تتحرش نظراً للبيحصل فيهم! بيكونوا فاكرين إن ده عادي!
ليه في مصر عايزين الحكومة تحترمنا ليه إذا احنا مش بنحترم بعض؟ البنات في الشارع من حقهم على من يقال عنهم رجالة انهم يحموهم و يحترموهم مش يكونوا أول ناس تسيء لهم بالكلام و النظرات و في حالات التطرف مد الأيد!
أنا قعدت في أمريكا ٩ شهور كان أكتر شيء بعمله و أكني محرومة هو المشي في الشارع! مجرد احساسي اني ماشية بكل أمان و إن مفيش ٥٠ عين مبحلقة فيا و ٥٠ كلمة زي القرف هتسمم بدني بيخليني استمتع بنفسي و أنا بعمل حاجة المفروض انها عادية جداً
و بلاش كلام فارغ بقى من نوعية البنت هي اللي بتستفز الولد إنه يعكاسها لئن زمان أيام جدتي و جدتك كانوا بينزلوا بالفساتين والجيبات القصيرة و محدش كان بيقولهم تلت التلاتة كام!! و مهما البنت لابسة فهي حرة و إنت كرجل غصب عنك تعملها إحترام! و قدامي بشوف بنات محجبة و منقبات لابسين عبايات و بيتعكسوا برضه! اللي بيقولوا إن البنات بتحب تتعاكس فهل ده معناه إن أمك و أختك و صحبتك بيحبوا يتعاكسوا؟؟ طالما إنت مش بنت و محستش بالكسفة و الإنكسار بتاع واحدة تم التحرش بيها فا مش من حقك تقرر انها عاجبها كدة!
عملنا ثورة ضد الطغيان و الإستبداد و حققنا شئ كان شبه مستحيل و شلنا الدكتاتور... يا ترى هنقعد ٣٠ سنة تانيين على ما نشيل بقى الدكتاتور اللي جوا كل واحد فينا؟ اللي بيدي نفسه الحق إنه يغتصب و يعاكس و يبص ويلقح كلام عشان هو "راجل" و جامد و عارف إنه غالباً البنت مش هترد هنفضل ساكتين عليه؟ لازم نتغير من جوانا قبل من نتوقع أو نطلب تغيير ظروفنا!
بحلم بمصر فيها أمان وحرية و إحترام.. نفسي الراجل في الشارع يبقى راجل فعلاً و بدل ما يبصلي على اني رجلين وصدر يبصلي على اني أخت دوره يخلي باله منها!
صعبة قوي دي يعني؟
