رسالة إلى الوالي

إلى المجلس العسكري،

بكتب لكم رسالة يمكن عمرها ما هتوصل أو يمكن هتوصل و هتسببلي مشكلة بس أنا كنت حاسة إني محتاجة أقولكم الكلام ده

أول يوم سمعت هتاف الجيش و الشعب أيد واحدة و شفت الناس اللي بتطلع تتصور مع الدبابات و العساكر بكيت من الفرحة و كنت من الآف المصريين اللي صدقوا إن الجيش هيحمي ثورة

الجملة دي مش كلها اكذوبة لئن الجيش فعلاً كان ممكن يحمي الثورة عشان مين هو الجيش؟ أخويا و جاري و ابني و البقال و المهندس... فعلاً فيهم ناس قلبهم على مصر و في منهم ملايين نفسهم في الحرية و الديمقراطية و العدالة الإجتماعية... انما اللي لا يمكن كان يحمي الثورة و ماعرفش إحنا كان مخنا فين لما صدقنا الكذبة دي هما جنرالات مبارك اللي هما انتوا

استنوا بس ماترموش الجواب... 

ازاي هتحاسبوا مبارك و أعوانه إذا انتم شركاؤه و أوفى اصدقاؤه؟ كنتوا فين يوم موقعة الجمل؟ كنتوا فين يوم جمعة الغضب؟ مين اللي أصدر أوامر بتحويل المتحف المصري لبيت رعب مباح فيه تعذيب الثوار على أيد الشرطة العسكرية؟ مين إللي حبس مايكل نبيل و عمرو البحيري و محمد إسحاق و ١٢،٠٠٠ ألف مدني في السجون الحربية بعد الثورة اللي حلفتوا تحموها؟ مين اللي قتل علي ماهر؟ مين اللي حرض على المتظاهرين في مسيرة العباسية  اللي كنت نهايتها موت محمد محسن؟ مين اللي فض الاعتصام في صيام رمضان و ضرب أهالي الشهداء اللي كانوا بيناموا على الرصيف عشان يطالبوا بحق عيالهم اللي ماتوا في الثورة اللي حلفتوا هتحموها؟ مين اللي هدر دم جنودنا على الحدود سنين و إستحسن يضرب ولاد بلده بغاز و نار على إنه ياخد موقف يرد كرامتهم؟ مين إللي قال للشباب إنزل على ركبك يوم ما طلبوا بس إن علم الصهاينة ينزل؟ و مين اللي بيحاكم طفل عمره ١٤ سنة عشان هتف في ماتش كورة ضد وزير داخلية فاشي سابق قامت الثورة ضده هو قبل ما تقوم ضد مبارك نفسه؟ مين الهتك عرض البنات بكشوفات العذرية و مين اللي دهس المتظاهرين الأقباط تحت المدرعات و مين ضرب مينا دانيل بالرصاص عند ماسبيرو؟ مين اللي ساب لمبارك و كل المتهمين معاه شهور يستف ورقه قبل ما يفكر يحاسبهم؟ مين اللي ساب مبارك في اجازة مفتوحة في قصر في شرم الشيخ بعد ما قتل ٨٠٠ مصري؟ مين اللي بيحرم علاء عبد الفتاح من إنه يحضر ولادة ابنه البكري و سكت عن مذبحة محمد محمود لحد ما راحت أرواح ٤٤ بطل و عيون الآف؟ مين اللي فاكر إنه عشان يحمي نفسه هيدوس علينا بالجزم و هنسكت و فاكر إن قبضة الحديد لسة بتخوفنا و بيمد في قانون الطوارئ؟

أنا اسفة إني ببلغكم بالأخبار السيئة بس إجابة كل الأسئلة دي هي : انتوا

انتوا أكبر خطر على الثورة و كان أكبر خطأ ارتكبناه هو ترك الميدان يوم التنحي و عدم الاصرار على تسليم السلطة لجهة مدنية من البداية.. لكن كل خطأ ممكن يتم تداركه في أي وقت مافيش مشكلة!

لازم تفهموا إن أهم مطلب لينا بعد ما نخلص منكم و هنخلص منكم عاجلاً أو أجلاً هيكون محاكمتكم على كل الجرائم دي...

أنا اسفة إني في يوم صدقت وعودكم... بس اللي مصبرني إن التاريخ هايشهد على الحقيقة و هتفضلوا ليوم الدين في ذاكرته مجموعة من اللصوص... سرقتوا حلم و حولتوه لكابوس و في الآخر هنصحى و هنفوق و هنرجع كل حاجة زي ما كانت و هتعيش مصر حرة مستقلة و هيسقط حكم العسكر شئتم أم أبيتم 

تحياتي،

فرح سعفان

ده إللي قدرت عليه؟ تهجرني و تتحداني؟

عمري ما هنسي لما مديحة صحتني على خبر إن الجيش نزل الشارع يحمي الثورة! و عمري ما هنسي لما شفت الفيديوهات بتاعت الناس و هي بتهتف الجيش و الشعب أيد واحدة لأول مرة! ولا الناس اللي طالعة على الدبابات عشان تبوس العساكر و تتصور معاهم! 

بس برضه عمري ما هانسه اللي سمعته بوداني يوم 9 إبريل ولا اللي حصل لرامي عصام و غيروا من تعذيب ولا البنات اللي تم إنتهاك حرمتهم ولا مايكل نبيل ولا عمرو البحيري ولا هانسي القرطاس اللي خدناه بعد الإستفتاء أما إستفتونا في سبع عشر حاجات و غيروا سبعين من غير ما ياخدوا رأينا  ولا هنسي اليوم اللي الجيش سمح فيه إنه يتم ضرب نار على متظاهرين مدنيين عزل و يصيب واحد في راسه و واحد في بطنه كنموذج للاصابات عشان إتجرأوا و اتظاهروا قدام سفارة إسرائيل! وكما نقلت الرواية ان المتظاهرين خدهم  الحماس و حاولوا يقتحموا مبنى السفارة في أي حل من الأحوال لا يجوز إستخدم هذا النوع من العنف اللي ممكن يؤدي لموت بعض المصريين! هو الجيش والشرطة دول مصروف عليهم دم البلد عشان يبقوا مايعرفوش يعملوا أي حاجة غير انهم يقتلوا؟ مفيش تدريب على فض الإعتصام أو فض الإشتباك بالقوة دون الحاجة لإستخدم السلاح؟ بالذمة يعني؟ يرضي مين ده بجد؟ 

أنا فعلا مش فاهمة مدى غباء اللي بيصدر الأوامر دي؟ هو كان مغيب مش عارف إنه في ثورة كاملة قامت عشان الظلم والعنف و معاملة الشرطة للشعب على إنه قطيع من البهايم؟ تاني؟ هنعيدوا تاني؟ هرجع اكتب كلام ضد الجيش ذي ما كنت بكتب ضد مبارك و ضد الشرطة أو ضد كل ظالم مش مدي للمصريين حقهم الكامل في الحياه كا بني أدمين؟ طب الواحد كان مخه فين أما مبارك المخلوع قرر تسليم السلطة للمجلس العسكري؟! يعني ايه أساساً؟ يعني احنا نثور و الناس تموت عشان هو بروح أمه يقرر مين يحل محله؟ طب و مين بقى المجلس ده؟ دلاديل مبارك؟ بأمارة ايه بقى؟ 

رجعنا تاني لزمن التحكم في الإعلام و إعتقال النشطاء و تعذيب بس مبقاش بقى فالأقسام ده كمان في المتحف المصري! المكان المقدس اللي الناس بتيجي من كل بلاد العالم تشوفه و احنا بناخد العيال جواه نحط السيخ المحمي في صرصور ودانهم!! عملنا ثورة و طلع عين أبونا عشان الواد يكتب عن تجاوزات الجيش فا يتحبس ثلاث سنين و يتحاكم في غياب المحامي بتاعه كمان! أنا بجد مش مصدقه اللي احنا فيه! 

و من عجايب الدنيا السابعة بقى هي بجاحة أم الداخلية!! بقى سايبين البلد تضرب تقلب يا ولاد ستين جزمة و الناس تتقتل و تتقلب يمين و شمال ثلاث شهور  و فالحين تبعتم أمن مركزي يضرب غاز مسيل للدموع عشان تحموا سفارة الصهاينة؟ 

ما هي حاجة من الاتنين.. يا نطاطي راسنا للمجلس و نسجدله ركعتين شكر كل يوم و نسمح للفساد يرجع ذي أيام مبارك يا نلحق نفسنا والفرصة لسة موجودة! حرام علينا و عيب علينا اننا نسيب حد يستعبدنا تاني! حرام علينا و الله!! ده مفيش واحد... واحد يوحد ربنا غير العادلي اللي مبارك ضحى بيه من أول يوم هو اللي خد حكم و حتى في قضية متفرقلناش أوي ذي مثلاً قتل الثوار ولا خالد سعيد! يا ناس حرام عليكوا احنا بيضحك علينا!! 

أنا هروح أنام! تصبحوا على وطن حر!

"Those who deny freedom to others deserve it not for themselves." Abraham Lincoln