إسم التدوينة كان هتاف بيقولوه القليلين اللي كانوا بيحضروا جلسات محاكمة قتلة خالد سعيد رحمة الله عليه! القصة بدأت من سنة زي النهاردة! شاب مصري اغتيل على أيد اتنين مخبرين! ضرب مبرح حتى الموت.. بس كان حد فينا يعرف إنه الشاب ده هيكون الشرارة اللي هتفجر نظام حكم دكتاتور حكم بالقبضة والحديد ٣٠ سنة؟
أنا بحاول افتكر المجهود اللي إتبذل قبل الثورة نفسها من توعية و من كتر الحاجات مش فاكرة! الناس اللي كانت بتغامر بروحها و تنزل وقفات الكورنيش! فاكرين اليوم اللي قبل الوقفة؟ فاكرين التعليمات اللي أدمن صفحة كلنا خالد سعيد كان بينزلها قبل كل وقفة؟ و التنظيم لأماكن التجمعات؟ فاكرين الناس اللي إتضربت في الوقفات من بلطجية و شرطة؟
طب فاكرين منظر الناس على كورنيش اسكندرية اللي يخليك تدمع و هما مسكين مصاحف و أناجيل و واقفين في صمت؟ أنا المنظر ده كان بيقشعرني جداً!
فاكرين المظاهرات الصغيرة نسبياً عند المحكمة و أهالي المخبرين لما كانوا بينظموا مظاهرة "مضادة" و يتهموا خالد بالادمان؟ فاكرين الأهرام لما كتبوا على أخو خالد إنه إرتد عن الإسلام و إعتنق اليهودية؟
فاكرين لما بعد ما خالد مات بكام شهر لم الأدمن طلب مننا نعمل حملة على تويتر و نستخدم هاش تاج خالد سعيد عشان العالم كله يعرف قصة خالد؟
يا ربي سبحانك! يمكن لو محدش كان إهتم بقصة خالد مكنش كل اللي احنا فيه ده حصل! يعني لما كنا بنهتف لو كان خالد إبن وزير كانت راس العادلي تطير كنت إنت سبحانك عارف إنه هيحصل و إن راسه هو و أسياده هتطير!!
احنا لسة مخلصناش المشوار.. بس برضه اللي وصلنا له لحد دلوقتي كان بعيد عن أحلامنا! نفس جهاز الشرطة اللي كان راعب البلد بقى دلوقتي إلى حد كبير في مكانه الطبيعي.. مجرد عامل عند الشعب! نفس أمن الدولة اللي كان كاتم على أنفاس اللي جابوا أبونا دخلناه و فتشناه حتة حتة! العادلي مرمي فالسجن زي الكلب، مبارك إتخلع و الشعب بيتحرر حتى لو ببطق و كل ده في أقل من سنة!
شكراً يا خالد! إنت يمكن تكون حياتك انتهت... بس إنت رجعتلنا احنا حياتنا
ولا تحسبن الله بغافلاً عما يعمل الظالمون... صدق الله العظيم
No comments:
Post a Comment