سبحان الله
أكتر حاجة معبرة ممكن أقولها عن ٢٠١١
يوم ٣١ ديسمبر ٢٠١٠ كنت راكبة تاكسي في نيويورك.. اه أنا كنت عايشة هناك سنة... سواق التاكسي كان مصري.. صدفة...كانت الساعة حوالي الساعة ٦ و نص الظهر يعني بعد نص الليل في مصر بشوية... جالوا تليفون
"ألو.. أيوا... إيه؟ تفجير؟ فجروا كنيسة؟ فجروا كنيسة ولاد الكلب؟" فتحت تويتر لقيت BBC كاتبين فعلاً! مش عارفة ليه مهتمتش أوي.. كان يوم حلو و مكنتش عايزاه يبوظ و لسة في سهرة بليل.. يا عم سيبك إيه يعني تلاقيها حاجة بسيطة متكبروش الموضوع
يوم ٧ يناير كنت في واشنطن مع والدتي... كانت عايزة تروح مطعم معين أكلت فيه من مش عارفة كام سنة و مش فاكرة إسمه بس فاكرة المنطقة... و احنا بندور و الدنيا تلج لقينا حوالي ٢٠ شخص متجمعين و ماسكين يفط بالعربي.. إيه ده؟ دول توانسة!!! أوقف يا عم السواق! نزلنا من التاكسي و شاركنا في أول مظاهرة في حياتنا..
كانوا بيهتفوا ضد بن علي و كان لسة قبل هروبه و كان بنسبالي شيء مبهر لئن عمري ما شاركت في مظاهرة قبل كدة.. و إن احنا شفناهم صدفة... و احنا ماشيين كنت بحقد عليهم أوي و قلت لماما انا حاسة ان ثورة تونس هتنجح
يوم ٢٤ يناير بعت ايميل لأدمين صفحة "كلنا خالد سعيد" (مش وائل غنيم) و قلتله إني مش عاجبني فكرة الثورة و إنه مافيش حاجة اسمها ثورة بمعاد و إن هو المسؤول في نظري لو ناس ماتت أو اصيبت أو إتقبض عليهم... رد عليا و قالي مفيش تغيير بدون تضحية و الحرية لها ثمن و إن محدش نازل بالغصب و إني لازم أثق في المصريين شوية....
هديت... رديت عليه بإعتذار... بس كنت باخده على قد عقله.. ثورة إيه و هبل إيه؟ أكيد لو ثورة قامت مش هتقوم و أنا برا مصر! أنا طول عمري بحلم مع مديحة بحاجة كدة و دايماً بنقول مش هتحصل.. تحصل ازاي و أنا مش موجودة؟ (اللي مش عارف مديحة يرجع للتدوينات القديمة)
يوم ٢٤ بليل نسيت أشحن التليفون... يوم ٢٥ رحت الجامعة و تليفوني فاصل.. ده غير فرق التوقيت ٦ ساعات.. معرفش أي حاجة عن أي حاجة في مصر لحد الساعة ١٢ بليل بتوقيت مصر أما رجعت البيت..
روحت لقيت نافورة فيديوهات على الفايسبوك و تويتر و هلع و فرحة و رعب و ذعر و دم و ضرب... مكنتش فاهمة حاجة! قعدت لوحدي أعيط.. مكنتش عايزة أبقى بعيد و لوحدي
يوم ٢ فبراير نزلت في نيويورك أول مظاهرة في حياتي عشان مصر.. عرفت عن المظاهرة عن طريق الصدفة.. واحد في ألمانيا على تويتر عامل رتويت لواحدة صاحبته بتقول إن في مظاهرة يوم كذا في نيويورك و طالبة الناس تنشر.. في المظاهرة دي اتعرفت على ناس كتير! منهم ناس كانوا عايشين هناك طول حياتهم و ٣ منهم رجعوا مصر بعد الثورة قابلت واحد منهم صدفة في التحرير الاسبوع اللي فات، منهم ناس بقوا من أقرب أصحابي و ناس طلعوا بالصدفة البحتة أصلاً صحاب أصحابي في مصر! كلها صدف
يوم ٣٠ مايو.. بعد ما رجعت مصر بيومين بعت ايميل لجون جينسن.. صحفي كان بقالي سنة أو أزيد بتابعه.. قلتله اني بدور على شغل...
يوم ١ يوليو جالي رد من إيان لي.. صحفي تاني بيقولي إنه بيشتغل مع جون و جون مشي و إن بالصدفة هما لسة بادئين بيدوروا على حد فعلاً.. و ادالي معاد أروح الجورنال أعمل مقابلة
يوم ٣ يوليو بدأت شغل في دايلي نيوز اجيبت كصحفية و دخلت في دوامة مش عارفة أحدد لحد اللحظة دي أنا بحبها ولا بكرها... بدأت صفحة تانية خالص في حياتي.. صفحة مش هاتكلم عنها دلوقتي
ربنا بيسبب الاسباب... الصدف دي كلها مش صدف.. أكيد لها معنى أنا مش فهماه... مش عارفة كان إيه ممكن يحصل لو مكنتش في أمريكا ساعة الثورة ما بدأت بس مش مهم... المهم اني هنا دلوقتي و إن الثورة مستمرة
No comments:
Post a Comment