رجعنا تاني... موجة ثورة عنيفة شوية زيادة عن الدور اللي فات... العنف زايد من الداخلية بمساعدة كلاب العسكر... عدد المصابين فاق ال ١٧٠٠ و عدد القتلي فاق ال٢٠ في يومين بس..
المرة دي كنت على الأرض و شفت بنفسي و في لحظات عدت زي الحلم لأني كنت شفتها قبل كدة في التليفزيون أيام الموجة الثورية الأولى و لم أتخيل إمكانية تكرارها أو إني أنا شخصياً أعيشها بنفسي...
لحظة دخول المستشفى الميداني تحديداً كنت قوية و مؤثرة أوي فيا.. ذهول و صدمة و حزن و وجع قلب و فخر... كوكتيل غريب من الاحاسيس اللي مش راكبة على بعضها و الغاز المسيل للدموع مخليها صعبة الفهم...
إحساس بشع بالعجز و الكسفة من مالك و أحمد عبد الفتاح و أحمد حرارة و غيرهم اللي فقدوا بصرهم نتيجة تخاذلنا ٩ شهور في إسترجاع حق المصابين و الشهداء حتى تكررت المأساة.. بالذات حرارة لأنه فقد عينه الشمال يوم ٢٨ يناير.. و بعدين فقد عينه التانية يوم ١٩ نوفمبر.. و بعدين يقول أعيش ضرير بكرامة.. إيه القوة دي؟ إيه الإيمان ده؟
أصدقاء مصابين و ناس معرفة سطحية بس بحبهم برضه مصابين لكن الكل مستمر في المقاومة..
المقاومة.. كلمة بالنسبالي مرتبطة بالصراع الصهيوني الفلسطيني.. لاكن للأسف المجلس العسكري حولها لكلمة مرتبطة بصراع المصريين ضد المصريين التانيين
مقاومة الثوار المصريين للجيش المصري و للشرطة المصرية... لأ دي مش نكتة ده بجد..
دلوقتي الوضع مش باين أوي.. لو الصراع إستمر للصبح يبقى كدة في زيادة عن فترة عنف الموجة الثورية الأولى.. مطالبنا واضحة.. تسليم السلطة لجهة مدنية و تحديد موعد إنتخابات الرئاسة في ابريل ٢٠١٢
"اقتلني، قتلي ما هيعيد دولتك تاني - بكتب بدمي حياة تانية لأوطاني"
حضن الميدان اتفتح .. كان واحشنى
ReplyDelete