يوم ٩-٩ كلنا عارفين إن كان في مظاهرة كبيرة تحت مسمى "تصحيح المسار" و كانت البعض إعتبرها أول مليونية صريحة في وش المجلس العسكري بتدعوا لوقف المحاكمات العسكرية و بتطالب بجدول زمني واضح للمرحلة الإنتقالية...
بغض النظر بقى عن إيه اللي حصل في المظاهرة أحب أحكيلكم عن لقائي ببعض الفلاحين داخل الميدان.. هتسألوني إيه ده؟ هو مش المجلس العسكري كان عامل إحتفال بعيد الفلاح يا سبحان الله في نفس ذات الوقت بتاع المظاهرة؟ هقولك اه هو جاب الفلاح و قاله إنتا هتحتفل يعني هتحتفل بالذوق أو بالعافية... لاكن مش كل الفلاحين سمعوا الكلام...
رجب عبد الحميد من البحيرة جه مخصوص التحرير عشان يعترض على قوانين الإصلاح الزراعي اللي حسب كلامه هو "هي أس الفساد"
سألت رجب عن سبب مشاركته في المظاهرة كان رده كالآتي:
احنا عايزين حقنا من الإصلاح الزراعي... الإصلاح الزراعي أس الفساد عندنا في البحيرة. احنا طالبين الفلاحين يبقى ليهم أرض. و القطن بياخدوه مننا و التقاوي بياخدوا الكويسة مننا و يعطوها لاسرائيل و يسيبولنا احنا الزراعة الوحشة و الإقتصاد عندنا راح تحت الصفر. احنا عندنا أرض كتير لاكن موضوع المالك و المستأجر خلي الفلاح ساب الأرض و الأرض بارت و ماعدش فيه إنتماء للأرض. احنا عايزين موقف من الحكومة عشان الفلاح شريان الحياه زي المياه و الهواء... إذا كان الغفير و الوزير و الرئيس و كله كله بياكل من الزراعة... ليه نهمل الزراعة؟ و بعدين بيجيبولنا أدوية مسرطنة و عادمين الفلاح خالص، الفلاح معدوم نهائياً... ليه؟ احنا عايزين من سيادتكم تتكرموا علينا و تبصوا نظرة رضا للفلاح. الفلاح ليه مايبقاش سيد البلد دي؟ الوزير أبوه فلاح و الغفير أبوه فلاح و الرئيس أبوه فلاح و احنا كلنا فلاحين مايبقاش عندنا إنتماء لبعض ليه؟ و المياه عندنا شوية و المجاري مطلوقة على الأرض و فشلت الزراعة و شالوا الضريبة اللي على الأرض! شالوها ليه؟ طلقوا المالك على الفلاح.
بعدها قابلت سعيدة محمد من كفر الشيخ، كانت متعصبة أوي و بتزعق و هي بتتكلم و لما سألتها عن الوظيفة صرخت فيا "هو أنا بعرف أفك الخط لما هيكون عندي وظيفة؟ أنا فلاحة"،،، هي من نفسها اللي طلبت اني اسجل معها و أحكيلكم نص كلامها:
هما عملين عيد للفلاح، هو الفلاح عنده أرض؟ الأرض مش عند الفلاح، الأرض عند المستثمرين، عند الوزراء، عند رؤوس التعابين الكبيرة كلها، محدش بيعرف عنهم حاجة و التعابين الكبيرة هما اللي واخدين الأرض. وزير الزراعة كان في سيناء أول امبارح ليه؟؟ عند المستثمرين!! اللي واخد ١٠ الآف فدان و اللي واخد ٢٠ ألف! و احنا محدش يعرف عننا حاجة خالص! احنا معدومين في الأرض لا لينا دار ولا لينا أرض ولا لينا أي مكان نقعد فيه! خدوا ارضنا و إدوها للناس الكبيرة و الفلاح مخدش أرض من أراضي التسليم دي كلها. الفلاح أرضه إتاخدت، و أنا واحدة من الناس إللي أرضي إتاخدت و قاعدة في السكة أنا و عيالي و بسرح باليومية. اليوم اللي بلاقي فيه بجبلهم فيه عيش ياكلوه حاف و العيش الحاف مش لاقينوه! بروح عند الفرن بيضربوني و يقولولي لا مافيش، روحي انتي خدتي امبارح.
الكلام بيوجع.. معنديش تعليق غير إني في نص هدومي من سعيدة و رجب. يا ريت مننساش أهم مطلب للثورة: العدالة الإجتماعية
فكرة جميلة اللقاء معاهم..احييكى عليها
ReplyDeleteوَاللَّهُ غَالِبٌ عَلَى أَمْرِهِ وَلَكِنَّ أَكْثَرَ النَّاسِ لَا يَعْلَمُونَ
ReplyDeleteان شاء الله هيجي يوم الناس دي ترجع لهم الحياه مره تانيه بايدينا وبس ولازم نفهم انه اللي عمل الثوره هو اللي هيكملها وهو اللي هيحميها من الكلاب
بسم الله الرحمن الرحيم
ReplyDeleteاحب فى الاول احييك على المجهود ده و على المدونة
الفلاح فى مصر مش فلاح
هتسألينى ازاى يعنى ؟؟ ( أنت بتقول إيه يا عم )
بحكم عيشتى فى الارياف أحب أقول أنا الفلاح مش لاقى مياه تنفع للزراعة فى معظم مواسم السنة
(لان المياه طبعا بتروح فى العزب و المزراع بتاعت حسين سالم و أمثاله )
مفيش تقاوى (بذور و حبوب ) كويسة علشان يزرعوها
و دى مسئولية الحكومة طبعا
الاسمدة فى الجمعيات الرزاعية مش موجودة أصلا
كل ده وعايزين يكون فى فلاح فى مصر !!!
كل ده غير المبيدات الكيمياوية الى الحكومة بتشجع عليها و البركة فى يوسف والى
الفلاحين دول فى مصر ليهم الجنة
( قالك عيد الفلاح فى الاستاد فقال )