كلام بنات

أنا قررت أقول حاجة جديدة النهاردة... هقول كلام بنات و عشان كدة هيكون ملخبط و غريب و مش مفهوم... أيوا احنا لما بنزعل مش بنكون فاهمين نفسنا... طبيعي انتا مش حتفهم برضه... 

أوحش حاجة إن حد يكون واحشك بس انتا مش عرف تقوله... و أوحش حاجة برضه انك يكون جواك كلام كتير بس مش وقته يتقال... و أوحش حاجة كمان انه الاحداث اللي حواليك تفرض عليك مواضيع معينة تشغلك...

و على فكرة مش لازم لما أبقى زعلانة أقعد أعيط... ممكن أبقى زعلانة و اطلعوا عليك بشكل تاني خالص.. غير بوز الكلب اللي عادةً بيقلب بخناق... ممكن أعمل نفسي مش فارق معايا حاجة بس أنا فارق معايا كل حاجة... ممكن أعمل نفسي مش مهتمة و أنا بقى من جوايا هتجنن و بفكر فيك طول النهار و ممكن أعمل مشغولة مع إني ماورايش غيرك...

و مش لازم أمشي على مزاجك في كل حاجة... لو جيت على نفسي مرة مش هاجي على نفسي كل مرة... و مش لازم انتا بس اللي صح أو أنا بس اللي بغلط... احنا الاتنين بشر و بنغلط و بنهبل و عادي الحياه ممكن تمشي لو احنا عايزين بس لو عايزين نكلكعها هتكلكع برضه...

و ليه دايماً انتا إللي عارف مصلحتي؟ ليه أنا بحكم غلط و مش فاهمة كويس؟ مصمم تخنقني منك؟

ممكن نبعد أوي و أبقى زعلانة أوي بس مش هبينلك برضه و انتا إللي لازم تيجي تصالحني... هو كدة