مش كل العيون بتشوف الدنيا أبيض و إسود
"إيه المشكلة لما ننزل مع الفلول و أرامل العسكر و أبناء مبارك و مؤيدي شفيق؟ إيه المشكلة؟"
"ما هو ده اللي ودانا في داهية! ما هو التفرقة دي اللي ضيعتنا"
"هما الفلول دول مش مصريين برضه"
و النغمة دي بقى بتخليني "عايزة أرجع.. عايزة أطرش... عايزة استنطق" على رأي عمرو أديب...
أمشي بقى أنا و كريم حسين و أحمد سبايدر و عمرو مصطفى في مسيرة واحدة نهتف ثوار احرار حنكمل المشوار و يا شهيد نام و إرتاح و احنا نكمل الكفاح؟ بجد فعلاً؟ أنزل مع ناس طردت وائل غنيم و عمرو سلامة (اللي أصلاً أنا بتخنق منهم جداً) من عند الإتحادية قال إيه عشان "قعدوا مع الإخوان زمان"؟؟ أنزل مع ناس قالت يوم موقعة الجمل "أحسن يا رب يموتوا كلهم"؟ مع ناس لما ست البنات إتعرت و الشيخ عماد اتقتل قالوا "التحرير لا يمثلني"؟ أنزل مع ناس لما هتفنا ضد الداخلية عند قسم الدقي و قلنا الداخلية بلطجية زعقوا فينا عشان نسكت؟
أنا مش بزايد على اللي هينزل.. طالما الشخص أياً كان ماعندوش أزمة مع الحاجات دي أو شايف إنه ممكن يغض بصره عنها أو حاسس إن وجودنا "احنا" - الثوار الدائمين اللي بينزلوا دائماً ضد مبارك و ضد الجيش و ضد الداخلية و ضد الإخوان و ضد كل ولاد الكلب - مش هيضيره وجود ولاد الكلب شخصياً معاه في نفس المظاهرة ولا المطالبة بنفس المطالب و حاسس إنه راضي عن نفسه يتفضل.. مش همسك حد من إيده..
بس سايق عليكم النبي بقى ما تحسوسني اني ببيع الثورة عشان مش عايزة أنزل... ولا تبررولي وجود ولاد الكلب... ولا تحسسوني إن كل شئ يهون طالما في سبيل المصلحة العليا "الثورة".
لأ معلش.. اللي نازل ضد الظلم و القهر و الذل و عايز العيش و الحرية و العدالة الإجتماعية و الكرامة الإنسانية و تطهير القضاء و إعادة هيكلة الداخلية و حقوق الشهداء و محاسبة الفلول غير خالص اللي عايز بعبع لإخوان ينصرف بأي شكل و مستعد يجيب الشيطان ذات نفسه بدالهم عشان يخلص منهم.. ده حاجة و ده حاجة! و طالما مش نازلين لنفس الأهداف يبقى أنا مش شايفة المعنى إيه... متفقين على رغبتنا في الخلاص من الإخوان.. بس بعد ما نخلص منهم؟ نلعب دور تاني؟
لون المرحلة هو الرمادي.. بس أنا هفضل مغمضة عينيا برضه لأني مش عايزة أشوف الثورة باللون ده أبداً
No comments:
Post a Comment