Wednesday, June 5, 2013

بخاف أحلم

 مشكتلي الكبيرة مع مظاهرات ٣٠/٦ هي اني بقيت أخاف أحلم...

بعد تنحي مبارك زيي زي ناس تانية كتير.. بكل سذاجة تخيلت إن خلاص كدة الثورة نجحت. مبارك إتنحي و كل أحلامنا هتتحقق و هيبقى في عيش و حرية و عدالة إجتماعية و كرامة إنسانية.. خلاص مافيش حد هيتعذب في القسم تاني.. خلاص البلد هتنهض و هنعمل مشاريع فظيعة و كل الناس هيبقى معاها فلوس و أغلبية الشعب هتطلع فوق الحد الأدني للفقر.. و أحلام تانية كتير الواحد من كثر الهم نسيها.. 

و طبعاً ماحصلش..

بعدين مجزرة ماسبيرو حصلت و كنت واقفة قصاد فندق هيلتون رمسيس و قدامي شاب مضروب بالرصاص في بطنه و صحابه شايلينه سايح في دمه و محتاسين بيه لقيتني بقول لنفسي: خلاص! أخيراً! هي دي بقى اللي حتقوم الشعب ضد العسكر.. أكيد الشعب هيثور ضد مجلس عسكري مستعد يدهسه بالمدرعات.. بكرة الصبح البلد أكيد هتولع!! 

و طبعاً ماحصلش..

بعد شهر بدأت اشتباكات محمد محمود و الموضوع لمدة كام يوم قلب بجد.. و الآف من المصريين في الميدان و الشعب يريد إعدام المشير و كلام تاني كبير.. و طنطاوي طلع قال بيان و قالك احنا مستعدين نعمل إستفتاء على شرعية الجيش و ثبتني ثبت.. قلت بس.. الناس كدة جابت آخرها.. فوق ال ٥٠٠ مصاب و ٤٠ شهيد في ٥ أيام! لأ.. لا يمكن الناس تقبل بكدة.. الإعتصام هيضغط على العسكر يلغوا إنتخابات مجلس الشعب و طنطاوي أيامه تتعد.. 

و طبعاً ماحصلش..

شهر كمان و ست البنات إتسحلت و إتعرت قصاد العالم كله في أكثر مشهد مهين لكرامة الإنسان.. قلت بس!! لحد هنا و خلاص.. العسكر لعبوا في عداد عمرهم... شرف البنت زي عود الكبريت و اللي اتكسر مش ممكن يتصلح و كله إلا العرض.. أكيد بعد ما الفيديو إنتشر على النت و الفضائيات بكرة المسيرة هتبقي جبارة و مصر كلها هتشارك في الإعتصام و العسكر جنوا على نفسهم

و طبعاً ماحصلش..

دلوقتي في حالة غضب شعبي تجاه الاخوان أو يمكن احنا (معارضي مرسي) شايفين كدة عشان برضه بنبص على بعض جوا نفس البالونة. الناس من تاني نازلة تقول "الشعب يريد إسقاط النظام" و خلاص الإخوان اثبتوا انهم فشلة و إن مافيش أي فرق بينهم و بين مبارك. ماشي.. نزلنا يوم ٣٠ و هتفنا و اشتبكنا و تاني مات شهداء و تاني بقى في مصابين و عملنا كل حاجة في مقدورنا نعملها عشان نعبر عن رفضنا لمحمد مرسي و جماعته.. محمد مرسي إستجاب للضغط الشعبي و إتنحي أو قالك هعمل إنتخابات رئاسية مبكرة.. أي حاجة.. ها؟ هنعمل إيه؟ هنرجع المجلس العسكري يمسك فترة انتقالية جديدة؟ هل المعارضة السياسية عندها أي حاجة تقدمها كبديل أو في إستعداد لتوحيد الصفوف أو في حد متفق عليه يبقى قائد بديل لمرسي و الجماهير المعارضة تدعمه؟ ولا هنرجع تاني نتقسم بين زيد و عبيد و نطاط الحيط؟

هحلم إن يوم ٣٠ هيبقى بداية لنهاية الإخوان و هنخلص من مرسي و بعدين ألاقي الجيش مسك تاني؟ أنا مقدرش على وجع القلب اللي شغال على شريط بيسف ده... أنا بخاف أحلم لإن من يوم تنحي مبارك مافيش حلم حلمته غير و اتقلب لكابوس..

Photo Credit: @lamiahassan          

4 comments:

  1. لو مش هتحلم معايا مضطر احلم بنفسي.. لكني فالحلم حتى عمري ما هحلم لنفسي :)

    ReplyDelete
  2. نحلم أحلام صغيرة نحققها نستمتع بإنتصاراتنا الشخصية - دي ثورة

    ReplyDelete