المرة دي زي المرة اللي فاتت بس برضه غيرها تماماً...
المرتين كنت في أمريكا.. بس الفرق المرة دي هي الفرحة المسروقة اللي مش راضية تيجي بنفس...
العسكر شكلهم كدة عملوا إنقلاب علي مرسي.. طلعوا بيان يدوه في مهلة ٤٨ ساعة يستجيب لمطالب الشعب.. و ده بيرجعنا لإمبارح.. عدد يفوق الخيال من الناس نزلوا ضد الإخوان... مظاهرات تعتبر الأولي من نوعها في تاريخ مصر... قبلها بيومين مشاعري تجاه المظاهرات إتغيرت شوية و حسيت إن دي ثورتي اللي تعبت عشانها و ماينفعش أسيبها للفلول يركبوها.. المهم لما شفت عدد الناس و كدة فرحت بالزخم الثوري لكن برضه من جوايا كان في سنة قلق من اللي بعد المظاهرات و في نفس الوقت إشمئزاز من مؤيدي الجيش اللي بدأوا يظهروا قوي عالسطح بكل بجاحة...
المرة اللي فاتت كان لها إحساس تاني و فرحة تانية و قهرة عدم القدرة علي المشاركة يعني كانت قتلاني... المرة دي عادي مش حاسة إني فارقلي أبقي جزء من الحدث قد ما كان نفسي أغطيه كصحفية.. إنما الفخر و السعادة و الغيرة و القلق و كل لخبطة المشاعر العظيمة بتاعة المرة اللي فاتت مش موجودة.. ده غير كارثة اللامبالة تجاه الناس اللي ماتت.. ده أنا حتي ماعرفش كام واحد مات (هما أكثر من ٧) و كام مصاب و لا حتي إسم من أساميهم
نرجع بقي لموضوعنا.. دلوقتي مش عارفة إيه اللي بيحصل و اللي هيحصل.. مرسي نزل بيان بيقول إنه مستمر و مالوش فيه و بيان السيسي كان فيه إيحاءات مش مقصودة و لخبطت الناس... إيه خارطة الطريق اللي السيسي هيقترحها دي؟ الجيش هيمسك؟ طب ليه مرسي مايمشيش و يجي مكانه رئيس المحكمة الدستورية؟ طب يا تري في مفاوضات بين السيسي و جبهة الإنقاذ؟ ممكن بعد كل ده البرادعي يبقي رئيس؟ الجيش هيعمل حظر؟ هنخلع رئيسين في ٣ سنين؟
يا خبر النهاردة بفلوس بعد يوم هيبقي ببلاش
No comments:
Post a Comment