عديت من عند القصر الرئاسي و فوجئت بمنظر مزعج جداً.... سور القصر بطول الشارع متغطي شخابيط و كلام و شتائم...
طب سؤال... هو القصر ده مِلك لمرسي؟ ولا رمز لمصر و مِلك لينا كلنا؟ يعني مرسي حيقعد يعيط مثلاً عشان مشتوم على سور القصر؟ ولا هو أي قرف و خلاص؟ما اللي محروق من مرسي أوي كدة يروح يشخبطله على سور بيته في التجمع الخامس بدل القذارة بدون داعي على سور القصر الجمهوري! اعتبروا أبوك يا أخي :)
و سيبكم من القلش و "ما ذنب السور؟" و "ما ذنب النباتات؟" و هو يعني السور أحسن من الناس اللي بتموت و الكلام اللي مالوش لازمة لإن مش ده اللي بتكلم فيه عشان يوم ما واحد يبقى بيشخبط على الحيط و في المقابل حياته تروح حبقي أول واحدة بعترض... اللي نازل يتظاهر ضد مرسي و نفسه يشوف مصر أحسن.. إيه اللي يخليه يلوث سور القصر بالمنظر اللي يزعج اللي رايح و اللي جي؟ طول اليوم عمالة أسمع كلام من ناس كبار في السن عن قد إيه "الناس اللي عند الإتحادية" بوظوا القصر و "دول لا يمكن يبقوا ثوار" و خلاص "الثوار قعدوا في البيت و اللي في الشارع بلطجية" و كل ده بسبب شوية شخابيط على الحيط! يعني حتى ماهواش جرافيتي كان يمكن يبقى مبلوع شوية على إنه نوع من أنواع "الفن"!!
الثورة أو أياً كانت القضية اللي نازلين يتظاهروا عشانها هيكسبوا أرض ازاي من التلوث ده؟ إيه فكرة إن أنا أنزل أبوظ حاجة و أنا المفروض نازل عايز "أصلح"؟ ولا أنا بقى مش عايز أصلح حاجة أنا نازل أزيط؟
لو مرسي ساكن جوا هرم من الأهرامات هنروح نشخبط عليهم؟ ده القصر ده تحفة عمرها ١٠٣ سنة... احنا بنعاقب نفسنا؟ مش عاجبنا مرسي نروح نِشَوه مِلك عام؟ و تفتكروا حد يقدر يرسم على سور البيت الأبيض أو قصر الإليزيه؟
يا رب احمي الثوار من نفسهم و من حماسهم الزايد و التصرفات العشوائية اللي في النهاية هتدمرهم تدمير ذاتي
متفق مغاك جدا وهوه ده اللى بحاول اوصله للناس بس يقعدو يقولو انت عندك البشر ولا الحجر
ReplyDelete