نص ساعة مع أخو الشهيد

النهاردة ركبت تاكسي في طريقي من مصر الجديدة لميدان التحرير.. وقفلي تاكسي عليه صورة كبير لحمدين صباحي و أول ما دخلت لفت نظري إن السواق معلق كارت الشهداء في مراية العربية بس كان في شهيد معين وشه متكبر و مكتوب تحته إسمه: الشهيد محمد سليمان توفيق

بداية الكلام كان عن الإنتخابات و قالي إنه عضو في ائتلاف أهالي الشهداء و كان عضو في حملة حمدين صباحي في المطرية و هيقاطع الإعادة... سألته الشهيد يقربله إيه قالي "أخويا... مات في جمعة الغضب قصادي..." 

سكت و إتكسفت... شئ مخجل... أصلي هقول إيه؟

و بعد دقائق من الصمت المحرج بدأنا نتكلم عن محاكمة مبارك و سألته إذا كان أخوه من ضمن الشهداء اللي المخلوع متهم بقتلهم.. قالي "محمد إسمه أول إسم في المجني عليهم.. أول إسم بيندهوا عليه" قلتله إن أنا صحفية فا هاكون متواجدة و إن احنا إن شاء الله هانتقابل تاني قريب...إبتسم بذوق و قالي إن شاء الله... سألته "حد من أهلك بيحضر معاك الجلسات؟" قالي اه عادةً والدي و والدتي كانوا بييجوا لكن آخر مرة والدي راح الأمن المركزي ضربوه و سحلوه..

ساعتها بس افتكرت... افتكرت إسم الشهيد محمد سليمان... و إسم "والد الشهيد محمد سليمان" و الفيديو اللي أنا مصوراه بنفسي و الصورة اللي أنا مصوراها بإيدي لوالد الشهيد محمد سليمان و هو بيتسحل... و افتكرت نظرات عينيه المذهولة و كلاب الأمن المركزي بيجروه على الأرض.. افتكرت إن عينه جت في عيني و نزلت الكاميرا و بدأت أصرخ و حتى فاكرة كويس كنت بصرخ أقول إيه "يا نهار اسود حد يلحق الراجل العجوز" ...كانت أول مرة في حياتي أشوف حد بيتسحل.. حاجة لا يمكن أنساها و عشان كدة الصورة دايماً معايا على تيلفوني.. 

 فرجته الصورة و إبتسم بإستغراب و قالي "أيوا هو ده أبويا" .. قولتله إن أنا مصورة الصورة بنفسي... مارضيتش أقوله كل حاجة أنا فكراها لئن أصلاً مكنتش عارفة أقول إيه... 

قبل ما أنزل أخو الشهيد قالي: "أنا مش حسيب حق محمد.. لو هيعملوا إيه مش حسيب حقه... لو الناس كلها سابت حقه أنا مش حسيبه"

يا ترى يوم السبت مخبي إيه لأخو الشهيد؟ وجع قلب و حسرة؟ ولا إنتصار و فرح؟

يا ترى إيه حكمة ربنا من الصدفة المؤلمة دي؟ إيه الدرس اللي أنا المفروض أتعلمه؟