الكلام اللي هكتبه مش هيفرق في أي حاجة... و مافيش أي هدف منه غير إني بنفس عن غضبي
الإخوان المسلمين... لحد يوم ٢٨ يناير ٢٠١١ موقفهم الرسمي من الثورة كان عدم الإنضمام! ماليش دعوة بقى بالأفراد اللي نزلوا بغض النظر عن الأوامر... أنا ليا بالموقف الرسمي و ده مالوش علاقة طبعاً بشهداء الجماعة رحمة الله عليهم
في مارس ٢٠١١ لما الجماعة أعلنت عن إنشاء حزب الحرية والعدالة قالوا انهم في وقت انتخابات مجلس الشعب نيتهم الفوز ب 30% من المقاعد... طبعاً كلنا شفنا نتيجة الانتخبات كانت شكلها إيه
بعد فترة قالوا انهم لا يمكن يرشحوا حد للرئاسة عشان ميتكررش سيناريو الحزب الوطني و لما عبد المنعم أبو الفتوح قرر يخالف القرار ده فصلوه... بس بعد كام شهر "الظروف فرضت عليهم ترشيح خيرت الشاطر لإنقاذ الثورة"
قولتلي بقى إنقاذ الثورة...
طول السنة اللي فاتت الإخوان دورهم الوحيد في الثورة هو انهم يخذلوها... سواء بالإتهامات الباطلة تجاه الثوار كل ما يتم إقتراح "مليونية" للمطالبة بالقصاص أو وقف المحاكمات العسكرية للمدنيين أو التحقيق في قضايا كشوفات العذرية أو محاكمة مبارك و ده غير انهم أساساً كانوا بيرفضوا المشاركة و المرة الوحيدة اللي قرروا يشاركوا كان لرفض وثيقة علي السلمي اللي كانت هتضر بمصالحهم و مش عشان الثورة أو اهدافها
طبعاً مش هنسى أحداث محمد محمود اللي برضه ماشوفناش فيها وش الإخوان عشان كانوا مشغولين بإنتخابات مجلس الشعب رغم إنه تم قتل و إصابة مئات الثوار اللي كانوا بيطالبوا بتحقيق أهداف الثورة اللي الإخوان "المفروض" بيحموها بترشيحهم خيرت الشاطر للرئاسة
و مش هنسي برضه أحداث مجلس الوزراء بعد ما إتعرت ست البنات و اتقتل الشيخ عماد و إتضرب الشباب بكل وحشية.. مكانش للإخوان صوت برضه!
و برضه مش هنسي يوم ما الثوار عملوا مسيرة لمجلس الشعب و شباب الإخوان اللي أنا بكل سذاجة كنت مصدقة أكذوبة انهم "مختلفين" و "مش شرط ينفذوا أوامر المرشد بالحرف" وقفوا في طريق المسيرة و اعتدوا بالضرب على البنات اللي منهم ٣ أعرفهم شخصياً
و من يوم ما دخلوا مجلس الشعب و هما أغلبية فيه ماشفناش قرار واحد يوحد ربنا فيه إنصاف لربع هدف من أهداف الثورة... كله لت و عجن في كلام نسوان يا إما في قوانين فارغة يتمحور أغلبها حوالين الجنس
و في الأخر و بكل بجاحة بيروجوا لخيرت الشاطر تحت شعار "صوتي للثورة... صوتي لخيرت الشاطر"
أنهي ثورة؟ أنهي ثورة بالظبط؟؟ الثورة بريئة من الإخوان اللي عمرهم ما كانوا ولا حيكونوا جزء منها فا كفاية كلام بلسان الثورة عشان إنتهازيتكم مفضوحة و أطماعكم ريحتها وحشة
No comments:
Post a Comment