ماجبتش سيرة أمهات الشهداء طول اليوم ولا كتبت عنهم حاجة ولا حتى فكرت اغتنم فرصة إني جالي لحد عندي ايميل كله أرقام لأمهات الشهداء و اتصل بيهم أقولهم أي حاجة بمناسبة عيد الأم...
السنة اللي فاتت كلمت أم خالد سعيد... أول ما قالت ألو و قلتلها أنا مين و بتصل ليه فتحت في العياط و هي اللي بقت تهديني... كنت في نص هدومي! هو أنا بكلم الست أهون عليها ولا باكلمها أنكد عليها؟
طول السنة اللي فاتت كان عندي أمل اننا بمعجزة ما هنرجع حق اللي راحوا و ساعتها لما يجي عيد الأم يبقالي عين أكلم أم الشهيد أقولها كل سنة و انتي طيبة يا أم البطل.. انما مكانش ليا عين حتى أجيب سيرتهم على لساني..
كان نفسي أكلم أم خالد تاني و أكلم أم علاء عبد الهادي و أم مينا دانيل و أرملة الشيخ عماد و أم عصام عطا و أم بهاء سنوسي و أم سالي زهران و أم زياد بكير و أم محمد مصطفى و كل أم شهيد مانعرفش إسمه و مات في الصمت و كل أم إستنت ابنها يرجع و مرجعش و كل أم ملحقتش تقول لإبنها انها بتحبه أخر مرة و كل أم مش حتسمع ضحكة ابنها تاني بس هكلمهم أقولهم إيه؟
أنا هستني... هستني و هكلمهم لما الثورة تقوم و تنجح و حق اللي مات يرجع و ساعتها أقولهم مبروك
Photo Credit: Ahmed Hayman - @AhmedHayman
No comments:
Post a Comment