Sunday, December 18, 2011

و دي رقصة المجنونة


سريالية مستمرة من أول يوم في السنة... أحداث ولا في الاحلام 

خيال أجدع مؤلف لأفشل أفلام خيال علمي لا يمكن هتجيب الحاجات العجيبة اللي شفناها

زي مشهد الدولاب و هو بيترمي علينا من فوق مبنى مجلس الشعب
أو مشهد بنت بتضرب شلوت في صدرها اللي كشفه عساكر جيش مصر و هما بيسحلوها 
أو مشهد عسكري جيش واقف على سطح مجلس الشعب بيعمل بيبي على الشعب
أو مشهد هجوم بلطجية على المعتصمين و هما راكبين جمال
أو محاولة إغتيال الثوار عن طريق سندويشات حواوشي
أو مشهد مدرعات جيش بتسحق متظاهرين سلميين في ما لا يمكن وصفه غير إنه كان مجزرة للأقباط
أو مشهد محاولة تبرير دهس المدرعات للمتظاهرين بإن العسكري توتر من الخضة إسم النبي حارسه
أو مشهد محاولة تبرير دهس المدرعات للمتظاهرين تاني بعد ما فشلت المحاولة الأولانية بإن الدبابات كانت مسروقة
أو مشهد عساكر جيش بتضرب متظاهرين بألعاب نارية و أطباق صيني
أو مشهد عساكر أمن مركزي بيحموا جنينة لمدة شهر بالسلاح على مدى ٢٤ ساعة
أو مشهد الشرطة و هي بتهجم على موتوسيكل أعزل و تنزل فيه ضرب بالعصيان و تحرقه عقاباً ليه على مساعدته في نقل الجرحى
أو مشهد  عساكر أمن مركزي بتطلب مني أصورهم صورة للذكرى في وسط معركة طوب ما بين أنصار مبارك و معارضيه في أول أيام محاكمته
أو مشهد عسكري أمن مركزي و هو بيدوس عليا و بينط على كتفي عشان يمسك فرد من أفراد الالتراس
أو مشهد الإفراج عن ٢٧ متهم في قضية ماسبيرو بإستثناء علاء عبد الفتاح بالذات و دوناً عن الجميع
أو مشهد وجود إسم الشهيد مينا دانيال ضمن قائمة المتهمين في قضية ماسبيرو
أو مشهد الشرطة العسكرية و هي بتهجم على البورصةأثناء ماتش الأهلي من باب فرد العضلات
أو مشهد لجوء الشرطة العسكرية لبناء حوائط اسمنتية في كل مكان يحصل فيه إعتصام أو إشتباك زي السفارة الإسرائيلية أو محمد محمود أو القصر العيني
أو مشهد العيساوي و هو بيقول احنا (الشرطة) إتضرب علينا غاز هما (الثوار) جايبنه من ليبيا
أو مشهد طنطاوي و هو بيقول صابرين صابرين صابرين
أو مشهد الهتافات ضد العسكر اللي بتقوم من جوا قلب كاتدرائية و من جوا قلب الازهر

هنحكي لأولادنا.. بس يا ترى هيصدقونا؟ أشك



Photo Courtesy of @msheshtawy

2 comments:

  1. أو مشهد اقتحام مسجد احتمى به الثوار
    أو مشهد نقض الهدنة و ضري المتظاهرين أثناء الصلاة
    لا و ألف لا لحكم العسكر

    ReplyDelete
  2. ماحدش هيصدقنا .. انا بحمد ربنا انى عايش فى التوقيت ده .. اوﻻدي هيسألونى كان بيحصل ايه ومش هيصدقوا لما أقولهم ان عدوا الشعب المستفيد من الثورة هو هونفسه الشعب بتوع اسفين ياريس وبتوع اﻻستقرار
    انا فخور انى عايش فى وقت التاريخ بيتكتب فيه

    ReplyDelete