و الله إحنا غلابة... و لما بقول غلابة مش بتكلم من ناحية الفقر لأ...
أولاً, مالناش سعر في بلدنا فا بالتالى مالناش سعر بره بلدنا... معني الكلام إنه هنا في وطني الحبيب عادي جداً نتهزء و نتمرمط و نتشتم و نتضرب لما نقول يا بس و ممكن كمان نائب في مجلس الشعب يقول إنه المفروض الكلاب المركزية... أسفة... الأمن المركزي يضرب نار علي المتظاهرين عشان فى 80 مليون فا عادي يعني!!
و الله الراجل ده عنده فكر مش عند حد... هو بيفكر لقدام.. يعني عشان تعداد السكان في الطالع و العيال بتوع المظاهرات كلها كام سنة و يتجوزوا و يخلفوا و يبلونا بقي.. نخلص منهم أحسن.. علي إيه يعني؟
مش هتكلم أصلاٌ علي اللي بيحصل في الأقسام و السجون لأن دي بقت حاجات مملة و بيتهيئلي واقع كلنا عارفينه. ولا بقي طنطيت الظباط و كمان العساكر... كام مرة كدة و إنتوا في حالكم لا بيكم ولا عليكم جيه شملول و طلع بأى حجة عشان اخد منكو قرشين؟ سواء بقي قال الركنة دي غلط يلا عالقسم أو إثنين قاعدين في العربية مستنيين حد يقولهم كدة دعارة ولا حتي شباب علي ناصية فجأة بقدرة قادر يبقوا متهمين بحيازة حشيش لو مظبطوش اللى مسكوهم بقرشين حلويين... كل ده عادي بيحصل مش كدة؟ و غيره و غيره كثير... الحكومة الحمدلله مش مخليه في نفسنا حاجة
الحمدلله على كل شيء
No comments:
Post a Comment