من سنة كاملة كنت كاتبة تدوينة عن إني سايبة مصر مؤقتاً و هرجع عشان "دي بلدي أنا و هما اللي يمشوا مش أنا" طبعاً كنت بتكلم كلام أهبل ولا كنت أتخيل إن اللي حصل بعدها بشهر يحصل... هو فعلاً مبارك مشي و أنا رجعت بس جه بدالوا اللي أوسخ منه مليون مرة... جه بدالوا اللي خلاني خلاص كارهة العيشة في مصر و عايزة أمشي تاني لئن ماليش مكان فيها
عدد الشهداء بيزيد يوم عن يوم... الواحد مبقاش ملاحق على الأسامي.. بحاول دايماً أعرف اسمائهم عشان ميبقوش مجرد إحصائيات.. عشان أبقى دايماً عارفة إسم الشخص اللي مات و هو بيدافع عن مبدأ و حق... بس المجلس العسكري بيصعبها عليا أوي.. مش لاحقة.. كل يوم ناس بتموت هلحق احفظ اسمائهم امتى و ازاي؟
اتنين بالتحديد موتهم وجعني غير الباقيين.. مينا دانيل و محمد مصطفى
مينا دانيل مات مقتول برصاصة في الصدر يوم ٩ أكتوبر في أحداث ماسبيرو و محمد مصطفى مات مقتول برصاصة في البطن في أحداث ١٩ ديسمبر
معرفش ليه بالذات دول مش قادرة استوعب انهم ماتوا.. في حاجة فيهم شداني و مخلياني حباهم أوي أكنهم جزء من حياتي مع إني لم اتشرف بمعرفتهم في حياتهم
أنا فاهمة إنه ده عمرهم و ربنا كاتبلهم كدة بس مش معناه إن اغتيالهم بالأسلوب ده مقبول! زينة شباب مصر.. دكتور و مهندس و عالم دين و بطل رياضي و طفل و غيرهم ماتوا و بأي ذنب؟ بأي ذنب بجد؟ انهم قالوا يسقط حكم العسكر؟ انهم قالوا عايزين عيش، حرية، كرامة إنسانية؟
كنت هاكتب "سعرنا بقى رخيص أوي" بعدين مسحتها و ضحكت جوا نفسي.. إيه "بقى" دي؟ على أساس إنه كان لينا سعر قبل كدة مثلاً؟ بلا وكسة مبارك ولا طنطاوي.. هي هي مش فارقة.. دكتاتور، مجرم، قاتل، ظالم، فاسد، فاشي...
الفكرة إن البهايم دول كان عندهم فرصة يبقوا ابطال.. كان ممكن يحموا الثورة و يساعدونا نحقق مطالبنا لاكن خوفهم على المناصب عماهم و خلاهم يبقوا أكبر عدو للثورة... الواحد بيبص على تونس و ليبيا و يبقى عايز ربنا ياخده... الواحد يسمع بكاء أم الشهيد و هي بتعيط على إبن عمرها اللي راح يبقى عايز ربنا ياخده .. الواحد يشوف منظر عشرات المصابين في كل مظاهرة و هما سايحين في دمهم أو و هما ماشيين مربطين و يبقى عايز ربنا ياخده... الواحد يشوف منظر بنت بتتسحل و جسمها مكشوف قدام العالم و يبقى عايز ربنا ياخده...
الصراحة الفترة دي أنا مش عارفة إيه الحل و غير متفائلة تماماً... قلبي موجوع و حزينة و مش لاقية أي بصيص أمل أكلبش فيه.. بدأت جدياً أفكر أرجع أمريكا.. مش عايزة أقعد هنا بس لو رحت هناك هنسي هنا؟
ماظنش
Photo: Hossam el-Hamalawy
مقاله بتعبر عن الي جوانا، بظبط ، تعبنا ، من حرئه قلوب الاهل الي كل شويه يموت ليهم حد، واحنه لما نفكر ان الناس دي واجه الموت علشان كانت بتحلم بحيا افضل لينا كلنا، ... وبعدين حتي الامل موتوه جوانا،، دول معاهم سلاح وعندهمش لا مخ ولا آحساس ودي كلها اسلحه مضمونه للقضاء علينا. طب خلاص يعني حقوق الي ماتو دول هتروح هدر، وحقوق الي اتسحله وحقوق الي فقدوا عيونهم واجزاء من اجسامهم هتروح هضر وحقوق المظلومين الي في الشجون العسكريه هتروح هضر....نحاول نفكر في حلول .. بس ارجع واقول كل الي مسكين البلد نصابين وحراميه وقتالين قتله. بس بردوا في ناس في مصر كتيييييير اوي ابطال زي الي ماتو لازم نتحد ونوحد كلمتنا ومنيآسش ونقف ضد الطاغوت لغايه لما ربنا ينصرنا.. متسفريش لان دلوآتي البلد محتاجه كل الناس الي بتحبها يكونوا موجودين ويدافعوا عنها،
ReplyDeletea2ool eih? Amin!!!
ReplyDeleteLaw geity hena mesh 7atensi bardo... w bossy 7awaleiky. Shoofi eih elli 7asal fi Occupy Oakland. El estebdad fi kol 7etta mesh fi masr bass.. laken el feloos wel ra5a bey5allina nensa w noskot.
ana bardo khayef 2wy 3ala elthawra, e7na momken nkoon fas3ab wa2t delwa2ty, elthawra betwageh akwa hagma fe3lan men ayam jan, w feeh nas keteer mesh fahma w nas betdawar 3ala masale7ha, ana delwa2ty banzel bas 3lshan elnas elestashhedet d madaya3sh el3amaloh. bas lama bafteker elro7 f mohamed mahmoud, ezay eldonia kolha 2t2alabet fe youm w leila, ezay kona benroo7 kol youm elmedan b mosa3dat bel habal, 2a2ol la2 lesa elthawra feeha 2amal, lesa el grand rise ma7asalsh, bas gy inshalah. Elmohem enena nekamel.
ReplyDelete