كل الناس كتبت عن الأسباب اللي هما عشانها نازلين التحرير تاني يوم ٢٧!! سواء أسباب متفق عليها من قبل كل القوة السياسية المشاركة أو أسباب بعضهم متفقين عليها و بعضهم لأ (و هي دي الديمقراطية.. إن رغم تعدد الأسباب انما الهدف الواحد بيخلي الجميع يقف صف واحد يدافع عن حق التاني في إنه يقول رأيه بحرية).. أنا مش هدعي اني فهم قوي اللي بيحصل في مصر دلوقتي.. بالعكس أنا متلخبطة جداً و فهمي السياسي المحدود مش مساعد في اني اتخذ قرار من ناحية ايه الحاجات اللي أصلح للبلد دلوقتي.. فأنا مش هقول كلام كبير فالتدوينة دي لو ده الانتم مستنينوا!
أنا مفهمش في الإقتصاد.. خالص.. انما الأنا أعرفه هو إن مصر واجهت فترات كان الموقف الإقتصادي أسوأ بكتير من دلوقتي! و مكنش بيكون في ثورة يتعلق عليها شماعة الفشل الاقتصادي اللي هو كان نتيجة لسلب الدولة من كل ما فيها على أيد مبارك وال-٤٠ حرامي! كانوا زمان يلهوا الناس عن أزمة السولار بحاجات ذي ماتش مصر والجزائر أو قتل سوزان تميم.. انما بما إن النظام البائد مبقاش في ايده الأدوات دي و بقى في مجلس عسكري بدلاً منه فمن الطبيعي إنه تجي أساليب جديدة.. ذي ايه؟ الثورة موقفه عجلة الإنتاج! معلش لا مؤاخذة.. هي العجلة دي كانت ماشية امتى و ماشية رايحة فين إذا قرب نص الشعب تحت حد الفقر! و هو الثورة اللي قامت على مبدأ عيش، حرية، عادلة إجتماعية أو في ناس تانية كنت بتقول كرامة إنسانية هي اللي هتبقى بتحاول تعطل عجلة الإنتاج! طب تيجي ازاي بالعقل كدة؟
ثانياً.. المجلس العسكري بيدعي إنه حامي حما الثورة صح؟ طب اللي بيحمي الثورة ازاي بيحميها و في نفس الوقت وقف ضد المطالب بتاعة باقي الثوار؟ طيب اللي بيختلف مع باقي الثوار (ده إفتراضاً انهم جزء من الثوار) بيروح أخدهم كمدنيين ويحاكمهم في محاكمات عسكرية؟ هي دي الديمقراطية؟ هي دي الحرية؟
طب العيش.. العيش هيجي ازاي طول ما فلوس البلد كلها منهوبة و لسة مرجعتش؟ ماهو مصر أولى بالفلوس دي عشان نشتري بقى خمس ست عجلات إنتاج غير العجلة اليتيمة اللي كلنا ماسكين في خناق بعض عليها!! يعني بدل ما رجال الأعمال "يتصالحوا" مع الحكومة لأ هيخدوا جزأهم زيهم ذي أي حد و يرجعوا الفلوس إللي سرقنها دي نعمل بها مشاريع تنفع الناس الغلابة ولا إيه؟ بعدين هي العجلة دي حتمشي إذاي طول ما البلد مفيهاش أمن؟ و هي دي برضه غلطة الثورة؟ هما الثوار اللي سحبه الشرطة من الشارع و سايبين البلد تولع و معرفوش ينزلوا الشرطة غير أما المصريين نزله قدام السفارة الصهيونية؟
أنا هانزل التحرير عشان أنا زهقت من العيشة في بلد كلها ظلم و فساد... أنا مش عايزة أبقى دايماً خايفة أقول رأيي لحسن أمن الدولة يحبسني ولا المجلس العسكري يضربني ولا أما تطلع واحدة ذي بثينة كامل على التليفزيون تتكلم عن ظلم المجلس العسكري ميقطعوش عليها البرنامج! أنا عايزة أبقى زيي ذي أي مواطن في دولة حرة ديمقراطية! أنا مش عايزة أبقى عايشة في بلد اللي واصل فيها و ليه مصالح مع الحكومة بيتعامل معاملة مختلفة عني! عايزة المجلس العسكري حتى لو وجدوه فالحكم فترة مؤقتة يبقى حاكم عادل.. بيحاسب الناس كلها سواء! مش المدون اللي فضح انتهاكات الجيش لحرية الانسان يتحاكم في ٥ أيام و مبارك و شلته قاعدين في مكانهم محلك سر و فالأخر كمان يقولوا إستفتاء عن العفو عن مبارك!
طلباتي بسيطة يا سيادة المجلس الموقر! عيش،حرية،كرامة إنسانية! لو انتوا بتحموا الثورة فعلاً يبقى هتسعوا لتحقيق المطالب دي لأنها شرعية جداً و مش بتسيء للدولة ولا أمنها بأي شكل بالعكس دي أهم مكونات أي دولة متقدمة!
أنا هانزل يوم ٢٧ عشان احنا لسة مخلصناش الثورة! عشان لسه العدل متحققش! عشان احنا مأسقطناش دكتاتور عشان نستبدله بمجلس كامل من الدكتاتوريين! عشان أنا ذقت طعم الحرية و عجبتني و مش هضحي بيها تاني! عشان مافيش حد في البلد دي هيبقى مقدس و فوق المسائلة!
أنا هانزل عشان أنا عايزة أنزل و أنا حرة!
No comments:
Post a Comment